Le proiet "Memoria Ladina"

Le proiet "Memoria Ladina" de Emanuel Valentin, etnolog y antropolog cultural, se dá jö cun chëstes domandes y documentëia te na manira partezipativa l’arpejun cultural material ladin, i recorc y le savëi dla popolaziun tles valades ladines, metü man cun la Val Badia.

Vigni porsonna y vigni familia á n gromun de cosses te ciasa. Val cosses á gonot n gran valur, ince sce magari nia tres n valur material mo gonot plü emozional: cosses che an á arpé dal pere o la uma, dal nëine o la lâ; patüc che é lié a stories personales o dla familia, ogec vedli che nes cunta val sura la vita da zacan o ince daldedaincö.

Le proiet "Memoria Ladina", nasciü dala inrescida de dotorat de Emanuel Valentin pro l’Université Lëdia de Porsenu, ti ó ciarè plü avisa a chësc patüc y chëstes cosses tles ciases privates y documenté sura döt le savëi che taca pro chësc patüc y che nes cunta val sura la cultura ladina.

Por fa chësc vëgn fates racoiüdes publiches de patüc, suradöt por chirí cosses y stories olache na porsonna arata che ai ais da nen fá de val’ vers cun "Cultura Ladina" o che dijes valch dl "ester Ladin":

• Ogec da zacan mo ince d’aldedaincö, por ejëmpl de vedles massaries de mistiers tradizionai, documënć, libri y manoscrić y i.i.

• Retrac, material video o audio de porsones, usanzes, tradiziuns, da vigni dé, de laûrs, dla contrada, dl’architetöra y i.i.

• Stories y recorc che reverda le savëi da fá certes cosses, cer’ laûrs da zacan mo ince d’aldedaincö, da cujiné, savëi da paur y i.i.

Döt le patüc che les porsonnes porta a na racoiüda publica vëgn atiera digitalisé, chël ó dí che al vëgn fat n retrat digital di ogec o na scansiun tl cajo de retrac o documënc. De chësta maniera é vigni porsonna che se pó atiera indo tó a ciasa so patüc zënza messëi le lascé fora dales mans. Le proiet se tëgn ma copies digitales. An po ince porté plü co ma un n oget o öna na storia. Por deplü vëgn documentades les stories liades a chisc ogec y i savëis che te na gran pert va sura fora.

Döta la popolaziun é inviada da tó pert. Vigni porsona cunta, anfat de ci eté, de ci ses o profesciun. Vigni storia, vigni recort, vigni oget é sciöche n toch de n mosaich: metüs adöm cheriëii n cheder plü gran che po nes mostré sö cer’ aspec dla cultura ladina. De plü toć che vëgn coiüs adöm y plü gran che le cheder gnará.

"Memoria Ladina" é n proiet de Emanuel Valentin en colaboraziun cun:

• Facolté de Sciënzes dla Formaziun dla Université da Balsan

• Assoziaziun Antropologica Südtirol (EVAA)

• Istitut Ladin Micurá de Rü

• Museum Ladin Ciastel de Tor

Le proiet é gnü finanzié da:

• Repartiziun 18 Aministraziun dla scora y cultura ladina dl Intendënza y Cultura ladina dla Provinzia Autonoma de Balsan

• Ufize per la mendranzes linguistiches dla Repartiziun Mendranzes linguistiches y ntegrazion europea dla Region Autonoma Trentin-Südtirol